2Cor 10 | ATA | STEP | Eni alinga ulai noxinge sou ngaxavutala 'ilixo ane ne noxou Kalisito, la sou eni Paulo e nenge taxolu se'isisi mo talu'enenge noxou Kalisito. Eni e no mine axolu noxinge la amitema sou axolu tasiau ia eni amitema sou avikala pekia'u no mine axolu va'axu.

a 10:11Ko 2:3

b 10:21Ko 4:21

c 10:4Ep 6:13-17

d 10:82Ko 13:10

e 10:13Rom 12:3

f 10:17Iel 9:24; 1Ko 1:31

g 10:181Ko 4:4

2 Corinthians 10

Vaikala Pekia'u Noxou Paulo sou Xaixaiou Noxou Lataua

1 ^aEni alinga ulai noxinge sou ngaxavutala 'ilixo ane ne noxou Kalisito, la sou eni Paulo e nenge taxolu se'isisi mo talu'enenge noxou Kalisito. Eni e no mine axolu noxinge la amitema sou axolu tasiau ia eni amitema sou avikala pekia'u no mine axolu va'axu. 2 ^bEni alingainge lexe no mine eni ane'e la mamu sou avikala pekia'u loxo. No mine eni ane'e noxinge la eni umomomo sou avikala ulai noxi'a ta mitema mose'i ane ixavutala mo ivikala ikalavoi lexe nexi taxolu tamauli no anu 'ili'ilixo sou lialia 'osi uasi. 3 Manina nexi taxolu no anu lialia 'o, ia nexi ta'oxonu 'oto'oto noxixe loxo ta mitema sou lialia 'o i'oxonu uasi. 4 ^cMimii sou 'oto'oto ane nexi ta'oto'oto no anu ne anu mimii sou 'oto'oto sou lialia 'o uasi.Ia anu xavi noxou Lataua sou umamulonu vimelu pekipekia'u ne ulu'e. 5 Nexi tamamulonu vaikala 'oto'oto mo ta mitema mose'i me'a iavuti itooxa'a sou ioxe italuxu xavutala sou ilavusou Lataua. Mo nexi talokilokisou xavutalai'a ta mitema ukalusi sou ta'oxonu ilomu ulai noxou Kalisito. 6 Lexe ngingi ngalolomu laixe ukalu, la nexi ne taloo sou ta'italonu tu'umaxu utelo noxi'a ta mitema ukalusi ane ilavusou ilolomu uasi.

7 Ngingi ne ngamaisixe no anu mimii vasimolu no alesi. Ia lexe mitema vile xavutalau pekia'u lexe anu noxou Kalisito, la anu uxavutalanexi laixe la lexe nexi noxou Kalisito aloxo anu nesi. 8 ^dXo lexe eni atooxu xavi e Tila mulosixe mu'oki sevile la, sou tatulusinge ngatelo io loxo sou talapungengi ngalu'e uasi. La eni umomomo sou amaela sou atooxu sevile la uasi. 9 Eni amasaxa lexe eni avasi ieli sou a'oxongengi nga'ume no anu uoli voloxu noxilo mamu. 10 Xo mose'i ivikala lexe, uoli voloxu noxou tu'umaxu mo pekia'u musuku, ia anu mitema uxolu la anu mamalaxusi mo vaivaikalau ne mii vitanisi. 11 Ta mitema ane loxo ne laixe sou ilamana lexe nexi a loxovaa ane no anu uoli voloxu noxixe no mine nexi taxolu va'axu mo nexi pekia'ixe la, nexi taxolu iouvilesisi noxinge mo nexi pekia'ixe.

12 Nexi ta'oxonu loxo sou tano'u sosovo xe tamomosinge noxi'a mose'i ane i'itinu ualasi'a mamu. Ia no mine ane'i me'a itilovosi'a noxi'a la aloxo ne, mo me'a imomosi'a no tane'i la aloxo ne, la ane'i ne ilavusou mii ma'ia ne uasi. 13 ^eNexi ne, a loxovaa la, nexi tatoonexe uauli musuku uasi, ia nexi tasolonu tooxu noxixe ulai no anu xaixai ane Lataua mulosixe sou taxaxai sou, xaixai ne ane mune'e muxali noxinge kalumo ne. 14 Nexi ne talai taalasou xaixai texu noxixe uasi, xo anu aloxo ne la lexe nexi tane'e taxali noxinge uasi. Ia nexi ne teuli sou tene'enu a'alo laixe sou Kalisito noxinge. 15 La sou loxo nexi taalasou tou noxixe sou tatotou xai texu ane ane'i va'axu mixaxaisou ne uasi. Nexi taloopala lexe, no mine mulamulaxu tangengi noxou Kalisito uleme ulalai, la xai noxixe nonixi noxinge ne usuku u'oki manina. 16 Anu aloxo ne la sou nexi tamomomo sou talaanu a'alo laixe sou Kalisito no xalexalee lia uuli no laxungengi xo nexi tamasaxa sou taitinexi sou xaixai ane muxali mukalu no anu xai noxou itema vile uasi. 17 ^fIa, “'Ena'ei ane lexe uitinu, la uitinu mii ane Tila mu'oxonu.” 18 ^gXo anu loxo mitema ane molu u'iti'itinu la ne, anu uxali laixe no iou Lataua uasi, ia mitema anu ane Tila molu u'itinusi.